من سيضع الكريز فوق التورتة

السلام عليكم ورحمة الله وبركاته

لا تتعجبوا من عنوان الموضوع .. الموضوع مهم جدا جدا جدا ..

وسأترك الكلام على السجية لضيق الوقت و حتى يصل ما أريد ..

دلوقتي يا ترى لو حد بيعمل تورتة ويتعب فيها في اللآخر بيحب يزوقها صح ؟؟؟؟

وفي الغالب لازم حبة الكريز تبقى في وسط التورتة تزينها وتلفت النظر ليها وتشد الانتباه زي كده ..

طيب دا كله مفهوم لكن إيه الموضوع ؟

الموضوع إننا خلاص على بعد أيام من انتهاء شهر شعبان ..

وايه المشكلة ؟

مفيش مشاكل إن شاء الله .. بس دا شهر ترفع فيه الأعمال إلى الله .. هترفع صحيفة أعمالك السنة دي كلها إلى الله ..

عن أُسامة بن زيد رضي الله عنهما قال: قلت: يا رسول الله ! ما أراك تصوم شهراً من الشهور، ما تصوم من شعبان قال : ( ذلك شهرٌ يغفل الناس عنه، بين رجب ورمضان، وهو شهرٌ ترفع فيه الأعمال إلى رب العالمين، فأُحِبُّ أن يُرفَعَ عملي وأنا صائم )
رواه أحمد والنسائي وصححه الألباني في السلسلة الصحيحة 4 / 1898

تمام .. وإيه علاقة كل دا بالتورتة والكريز ؟؟

التورتة هي أعمالك طول السنة .. والكريز دا عمل فذ عايزين نختم بيه الصحيفة قبل ما ترفع إلى الله ..

فهل من مشمر ؟ .. هل من صاحب همة عالية ؟ ..

بس أنا لا أعمالي كانت تورتة ولا أي حاجة .. اسكت بس أنت ما تعرفش السنة دي عدت إزاي ربنا يسترنا ..

معظمنا كده إلا من رحم ربك .. لكن إيه المانع نختم الصحيفة بعمل كبير يمكن بسببه يتغفرلك كل الي فات وربنا ينزل عليك رحمته في الي جاي ؟

تمام طيب وايه العمل دلوقتي الفذ الي ممكن أعمله ؟

أعمال كتير :

ممكن مثلا تقوم الليل بالقرآن كله في ثلاث ليال كل ليلة 10 أجزاء

ياااااااااه.. أنتا داخل تهزر صح ؟

لا مش هزار إحنا بنقول عمل فذ ولازم يكون حاجة كبيرة .. وممكن بشوية إرادة وعزم وإخلاص بنا يباركلك ويعينك وممكن تعمل شوية حاجات تسهلك الموضوع :

- تستعين بالله وتلجأله وتبرأ من حولك وقوتك .

- تصلي العشاء في مسجد بيقيم بسرعة شوية الكام يوم دول علشان يبقى فيه وقت أكتر .

- تسرع شوية من رتم قراءتك .

- توفر حبة من النوم الكتير وممكن لو أنت بتشتغل تستغل وسائل المواصلات في النوم ( ولو في مصر أكيد بتلاقي المواصلات كل يوم واقفة ).

- تخفف أكلك علشان تكون نشيط.

- تنجز كل أشغالك قبل العشاء .

- لو حسيت بالتعب من الوقوف في قيامك صلي وانت قاعد المهم تخلص ال 10 اجزاء.

ولو ما قدرتش ممكن أعمل إيه تاني ؟

ممكن تختم القرآن تلاوة اثناء اليوم في 3 أيام .

ولو ما قدرتش ؟

حاول مثلا تتصدق بصدقة كبيرة ومش شرط تكون كبيرة في حجمها .. ممكن تكون كبيرة عليك كإمكانيات أو كبيرة مثلا للي هتديهاله مش متوقعها .

إزاي يعني ؟

يعن مثلا ست غلبانة معاها عيالها قاعدة بتبيع مناديل أكبر مناها مثلا إن حد يشتري منها باكو بنص جنيه .. تشتري منها الباكو مثلا ب 100 جنيه ..

أو تعدي عليها مثلا وتجيبل ليها ولأولادها وجبة أكل من مطعم كويس وحاجة ساقعة في الحر دا كأنك هتجيب لنفسك بالظبط .. ويا سلام لو جبتلهم حاجات حتى بتستخسر تجيبها لنفسك .

( أصحاب الربع جنيه القديم .. والبريزة الفكة الي ما بتتصرفش يمتنعون .. بنقول عمل فذ يا جماعة ما تنرفزوناش)

وايه تاني ؟

تفرج كرب مسلم سمعت إنه مزنوق .. واحد سمعت إنه غلبان و معهوش يدفع إيجار شقته ومزنوق قوي روح وادفع مكانه .. واحد واقع في مشكلة مادية ومحتاج قرض حسن اقرضه .

قال رسول الله صلى الله عليه وسلم : أحب الناس إلى الله أنفعهم ، وأحب الأعمال إلى الله عز وجل سرور تدخله على مسلم ، أو تكشف عنه كربة ، أو تقضي عنه دينا ، أو تطرد عنه جوعا ، ولأن أمشي مع أخي المسلم في حاجة أحب إلي من أن أعتكف في المسجد شهرا ، ومن كف غضبه ، ستر الله عورته ، ومن كظم غيظا ، ولو شاء أن يمضيه أمضاه ، ملأ الله قلبه رضى يوم القيامة ، ومن مشى مع أخيه المسلم في حاجته حتى يثبتها له ، أثبت الله تعالى قدمه يوم تزل الأقدام ، وإن سوء الخلق ليفسد العمل ، كما يفسد الخل العسل الراوي: عبدالله بن عمر المحدث:الألباني - المصدر:صحيح الجامع - الصفحة أو الرقم: 176
خلاصة حكم المحدث: حسن

في حاجة تانية طيب ؟

أيوة ممكن مثلا تنزل بين صلاتين وتكون شاري مجموعة كبيرة من الأذكار والكتيبات والشرايط والإسطوانات حسب المقدرة .. وتتنقل بين وسائل المواصلات مثلا توزعها على الناس .. تركب من هنا لهنا ويمكن ربنا يفتح بيك قلوب كتير.

وإيه كمان ؟

ممكن تصوم الثلاث أيام البيض وتكمل صيام في باقي شعبان .. دا أقل حاجة بدل ما أنت مكسل كده .

طيب ولو أنا مريض ومش قادر اصوم ؟

ممكن تنشر الموضوع دا على المنتديات الي أنت مشترك فيها أو تبعته لاصحابك على الماسنجر أو توريه لعيلتك وتاخد أجر الي هيعمل بيه .

قال رسول الله صلى الله عليه وسلم : إن الله و ملائكته ، حتى النملة في جحرها ، و حتى الحوت في البحر ، ليصلون على معلم الناس الخير الراوي: أبو أمامة الباهلي المحدث: الألباني - المصدر:صحيح الجامع - الصفحة أو الرقم: 1838
خلاصة حكم المحدث: صحيح

طيب ولو مش مشترك في منتديات وماعنديش ايميل ومقطوع من شجرة ؟؟؟

ممكن ترد على الموضوع علشان يفضل مرفوع والناس كلها تشوفه قبل ليلة النصف من شعبان ولما ترفع موضوع وحد يقراه ويعمل بيه إن شاء الله في ميزان حسناتك بس أنت أحتسب الأجر وأنت بترفع الموضوع .

كويس قوي كل دا حاجة تاني عايز تقولها ؟؟؟

أيوة .. تذكر سيدنا أبو بكر الصديق الي جمع الخير كله..

من أصبح اليوم منكم صائما ؟ قال أبو بكر : أنا قال : من عاد منكم مريضا ؟ ، قال أبو بكر : أنا قال : من شهد منكم اليوم جنازة ؟ ، قال أبو بكر : أنا ، قال : من أطعم اليوم مسكينا ؟ ، قال أبو بكر : أنا ، قال : ما اجتمع هذه الخصال في رجل في يوم ، إلا دخل الجنة الراوي: أبو هريرة المحدث: الألباني - المصدر: صحيح الأدب المفرد - الصفحة أو الرقم: 400
خلاصة حكم المحدث: صحيح

إيه المانع إنك تعمل كل دا وتجمع الخير كله وتبقى التورتة شبه دي .

ياريت نشد الهمم ونستعد ونبدأ العمل هما يومين بس .. وياريت كل الي عنده أفكار يضيف
نسألكم الدعاء في السجود وفي الثلث الأخير من الليل